بصي ياستي انتي وهي ياللي متشردين زيي وخطابكم مسافرين..
انا بقى قعدت ادور ع النت كتييييييير على برنامج ابعت منه رسايل ولقيت مواقع كتير اوي بس طبعا كلها استهبال وضحك ع الناس واللي محتاج رصيد واللي محتاج معرفش ايه وصراحة زهقت
دا غير ان الرساله لبرا مصر بواحد جندي ياجدعان
يعني
عشاان ابعتله رسالتين في اليوم يبقى في الاسبوع اشحن ب14 جنيه وفي الشهر ب
56 جنيه رسايل بس امال لو عملت فيها البت الفت وقولت اكلمه مرة ولا حاجة
والدقيقة ب 4 جنيه قولي 60 جنيه في الشهر عليه هو بس غير مكالماتي انا بقى
في مصر باصحابي والدكاترة وغيره وغيره
ليه ياجدعااان هو انا ابويا حرامي ولا بيدق فلوس
أم هند .. هند مين؟
طيب طيب سامعاكي ياللي بتقولي ماتخلصي يختي انتي هتقرفينا ليه
ماهو اصل انا لازم ارخم عليكو و اغلبكو شوية قبل ما ادخل في المفيد
هو انا كدا تنحةخلاص والله هقول هقول
من غير ضرب بسشوفي ياستي منك ليها ليها ليها ليها ليها ليها
الموضوع سهل جدا مفيهوش اي حاجة
-هتدخلي على جوجل بسيطه دي..هتكتبي Gmail
-هيدخلك على الجي ميل ويطلب منك تعملي إيميل هتعملي إيميل عادي جدا وسهل جدا بإسمك او بالإسم اللي تحبيه بس خدي بالك دا الاسم اللي هيظهر عند خطيبك لما تبعتيله الرساله..
لحد كدا بسيطة مافيهاش أي حاجة
-عملتي الإيميل يا فتوكة يا شطورة منك ليها ودخلتي عليه ركزي معايا بقى
-اول ما الايميل هيفتح هتلاقي على ايدك الشمال اقصى الشمال كلمة compose في مستطيل أحمر كدا سيبك منها انزلي تحتها بقى
-هتلاقي مستطيل كدا مكتوب فيه Search, chat, or SMS
بنفس الترتيب اللي انا كاتباه كدا وبنفس الشكل وهو دا اللي احنا عاوزينه هتيجي في المستطيل دا هتكتبي اسم خطيبك وبعد ماتكتبيه
-هيظهرلك قايمة فيها 4 خيارات اختاري منهم Send SMS
-هتختاريها هيظهرلك مستطيل كبير وتختاري اسم البلد اللي خطيبك فيها وتكتبي رقمه و تضغطي Save
بااااااااس كدا هيظهر اسم خطيبك وجمبه علامة موبايل ازرق صغنتوت كدا
-تدوسي على اسم خطيبك بالماوس طبعا مش برجلك
هيظهرلك المربع الحواري اللي هتبعتي منه الرسالة وليكي 50 رساله في اليوم الرسالة ب64 حرف ..
*طب اسمك هيظهر عند خطيبك ايه؟
هيظهر اسم الايميل اللي انتي عملتيه
*طب خطيبك لو حب يبعتلك هيبعتلك فين؟
لو عاوز يبعتلك على نفس الايميل مفيش مشكلة هتوصلك في المربع الحواري بتاعك وانتي قاعده ولو عاوز يبعتلك ع الموبايل يبعت مفيش مشكلة عشان لو مكنتيش فاتحة نت
*طب هو خطيبك لازم يكون فاتح نت؟
لا مش لازم ممكن يبعت من الموبايل ع الايميل عادي يعني هيعمل من رسالتك ريبلاي او رد عادي جدا ويرد
*طب وبالنسبة للرسايل جوا مصر؟
ممكن تبعتي رسايل جوا مصر بس لشبكة موبينيل فقط..اما اتصالات وفودافون لا مش شغالة.
*طب لو انا رغاية شوية وخلصت ال50 رسالة؟
ال50 رسالة لو خلصو عندك حلين:
الاول:هتضطري تستني لحد ما يعدي 24 ساعة وهتلاقي الرسايل زادت تاني لوحدها.
التاني:كل رسالة خطيبك بيبعتهالك ع الايميل بتشحنلك 5 رسايل عندك انتي لو رصيد الرسايل بتاعك اقل من 50
بمعنى انك مثلا بعتي 10 رسايل وبقى رصيدك 40 رسالة وجه خطيبك رد عليكي برسالة من موبايله ووصلت ع الايميل هتبصي تلاقي رسايلك زادت بقت 45 رساله.
منقول من فتكات
ليست هناك تعليقات:
إرسال تعليق