المفروشات اللازمة للعروسة بالصور والعدد

بسم الله الرحمن الرحيم

1- الملايات:



ملاياتك تبقى قطن اوعى تجيبي قماش مخلوط القطن احسن حاجة

تجيبى 12 ملاية للاوضة الكبيرة و12 لاوضة الاطفال
وبكرر كل واحدة حسب مقدرتها المادية

تجيبى 4 او 5 غاليين عشان لو جالك ضيوف مهمين
والباقى تفرشيهم عادى


طيب تعملى ايه بقى ياشطورة
تروحى تشترى قماش وتفصليه تجيبى قماش مشجر وسادة
هتلاقى المتر ب10 جنيه وفى ب 16

المشجر هتعمليه عادى
طب والسادة بقى

هقولك هتروحى لبتوع الكلف وهتشترى من عندهم اشكال بتتخيط مش بتلزق
هتلاقى هناك كل الاشكال زهور وفروع شجر وقطط وكلاب ودباديب
كل حاجة
يعنى ممكن تعملى ملايات
للاطفال وللاوضة الكبيرة

وعيشى بقى ياستى

اشترى الاشكال دى وخيطيها فى الملاية من الجناب وعلى اكياس المخدة واعملى لنفسك احلى طقم سرير وماكلفتيش نفسك حاجة وخامة قطن نضيفة

وكمان ممكن تجيبى كام متر ستان وتحطيهم على الملاية على طرف الملاية وعلى طرف المخدة اتمنى تكونوا فاهمنى

وممكن كمان تجيبى اوراجنـزا وتخيطيه على طرف الملاية
وختبان كانها ملاية غالية

وممكن تشتغلى على طرف الملاية بالكنافا للى بيعرفوا يشتغلوا كنافا

وممكن تودي الملاية للراجل اللى بيطرز الستاير يطرزهم لك يعملك عليهم وردة او اى شكل تانى

اختى عملت كده فى ملاية عندها وطلعت روعة




طيب نفسك فى ملايات العشق الممنوع
سهلة اشترى ستان ووديه للراجل يفصهولك هتلاقيه ارخص
انا بودى لواحد بيفصلى الملاية ب 10 جنيه

واحنا اتفقنا اننا هنجيب 4 ملايات غالية والباقى هنفصله

واحلى ملايات للاطفال عن تجربة المجد بس طبعا بقوا غاليين جدا دلوقتى





2- المراتب:


بصى اوعى تنجدى الله يخليكي انا ندمت ندم كبير على انى نجدت وغيرت وجبت مراتب جاهزة ولحاف جاهز

احلى مراتب بالترتيب كده

هابيتات

ألدورا التركى

ماستر بيد

دريم ستار اللى عندى ورعة بجد ماشاء الله
انتركوين

فوربد دى اقل منهم

المرتبة الوجهين صيفي وشتوى او وجه قطن وفايبر
احسن حاجة
وتبقى تقلبى المرتبة كل شوية عشان السوست

3- اللحاف الفايبر






اللحاف الفيبر تجيبى 2 للنوم و واحد للاطفال

احلى نوع لحاف اطفال المجد عندى وماشاء الله روعة

وفى الكوبرتة واحدة للنوم الكبيرة

وواحدة للاطفال

فى النوع الحلو اللى هو دبل فيس وجهين حلو اوى
بردوا المجد كوبرتة روعة


طيب فى بنات ممكن الميزانية خسعت وعايزين يجيبوا لحاف فايبر

هقولك هتشترى قماش قطن بالمتر اى شكل وهتوديه للرؤاجل يحشيه فايبر ويقفله

وده عملته بنات خالتى الاتنين وطلع رائع فعلا

بس اختارى قماش سادة او تشجيرة خفيفة عشان يطلع حلو

وممكن ايه فى الاطفال
تجيبى قماش الستاير قطن او ستان وتعملى الستاير واللحاف منه وبيطلع روعة
وبيكون احلى فى القماش السادة انا شفت صحبتى عملت كده فى اوضة الاطفال وكان لون اللحاف نبيتى غامق اوى
وقماشته ستان والراجل طرزه وحشاه فايبر واستغنت عن مفرش الزينة بتاع الاطفال



يارب تكونوا فهمتوا الفكرة

يبقى قلنا:


12 ملاية لغرفة النوم
12 ملاية للاطفال
2 لحاف فايبر لنوم
1 لحاف فايبر للاطفال
1كوبرتة للنوم
1كوبرتة للاطفال (ممكن تستغنى عنها)


فى حاجات تانية بقى :

زى المفرش الاسبانى
والبطانية الدفاية
دى ممكن تجيبهم وممكن لا
------------
الفوط:


تجيبى 30 فوطة او اكتر
ماتجيبيش اقل من كده لانك هتحتاجيهم
هاتى كام فوطة غالية من النوع التركى اللى ب 50
واكم واحدة من ال ب30 فيما فوق
وبلاش الفوط اللى فى علبة بتبقى رسمتهم مش حلوة
وهاتى لك 6 فوط استعمال من السادة اللى الواحدة ب 
18

 بصوا يابنات
***بالنسبة للمراتب الجاهزة لازم تشترى كفر للمرتبة
وده بيبدا من 20 جنيه وفى لغاية 200 و150
وده بيبقى كفر مبطن جلد
وده حلو جدا جدا
لانه بيحمي المرتبة من اى حاجة يعنى لو مايه اتكبت عليها بالغلط
او حد من الولاد عمل بيبي عليها والا حاجة
عشان سوست المرتبة ماتبوظش

المهم ان الكفر ده عشان الملاية ماتتزحلقش من على المرتبة يعنى اللى ب20 جنيه
ده موجود فى التوحيد والنور هتلاقيه كفر قطن


وتنسى بقى ان الملاية تتزحلق وكمان عشان يحمي المرتبة

كمان فى حاجة بالنسبة للبنات اللى سألت على اللحاف الفايبر للاوضة الكبيرة
ماركة فوربد حلوة ناس كتير بتشكر فيها انا ماجربتهاش

وممكن لو مفيش ميزانية بقى تروحى التوحيد والنور
وتشترى من هناك كفر لحاف شكله يكون بتاع عرايس
عندك من 25 وطالع وهتلاقى احلى كفر ب 65 تقريبا
وتروحى للمنجد وتشترى الفايبر هو هيقولك اللحاف هيحتاج قد ايه فايبر
كام رول وقد ايه أجرة ايده

ده شكل لحاف فوربد




***الفوط بقى
جنب عدد الفوط اللى قلتها فى المشاركة
هاتى برنس ليكي وليه
وفى بيجيوا طقم مع بعض
بردوا شفت برنس المجد كان حلو اوى اوى

وهاتى كمان 2 بشكير


**** وفى بقى المفرش القطيفة


فى ناس بتجيب للازضة الكبيرة ولاوضة الاطفال بيبقى عليه رسومات اطفال
وفى ناس مش بتجيبه


*** وفى الكوفرتة
فى انواع كتير للكوفرتات
يعنى فى كوفرتة بالملاية دى بتبتقى فايبر
وافتكر سعرها كان 270 تقريبا بس مش فاكرة نوعها
وفى كوفرتة السروجي ب 350 جنيه تقريبا


وفى نوع اسمه تابلوه
وفى كوفرتة قطن مش فايبر
ودى افتكر سعرها 300 جنيه

وفى كوفرتة قطن عادية ب 100 جنيه بالمخدة

وفى الكوفرتات العادية اللى احنا عارفينها ودى بردوا انواع فى ب 50 خشنة شوية وفى قطن ب90 تقريبا


كوفرتات الاطفال بقى زى ماقلت احلى حاجة المجد وبتبقى دبل فيس
ومعاه 2 تكوة و2 مخدة
انا فاكرة من مدة كده كانت ب 280تقريبا


*** ممكن فى بنات بتجيب المفرش الدفاية لو عايزة يعنى
ودى اسعاره بتبدأ من 18
بس احلى حاجة اللى هو الموهير ب55
زى الزبدة كده حتى وانتى بتشتريع بتقولى للبياع المفرش الزبدة
نفسى اشتريه والله ادعولى ربنا يوسعا علينا

*** البطاطين بقى كفاية 1
وفى انواع كتيرة احلى نوع مورا الاسباني ما اعرفش سعرها
وفى المجد

وهاتى بطانية الاطفال المجد بيجيوا مع بعض فى علبة واحدة ومش عارفة تمنهم بس افتكر ممكن يبقوا ب 360 مثلا
بس خلى بالك دول بيبقى مقاسهم صغير فاللى مش عايزة ممكن تجيب بدلهم بطاطين عادية
ممكن تجيبى بطانية غالية للاوضة الكبيرة وبطانية اقل شوية لاوضة الاطفال

***ماركات الملايات عشان البنات اللى سألت
على حسب علمى كالز -فوربد- العامرية -المجد -القطان

***ماتنسيش فوط العروسة الصغيرين اوى هاتى 12
وفوط المطبخ هاتى 12 فى ال3 ب10 جنيه
وهاتى 3 فوط حجم صغير اوى على قد ايدك عشان تنشفة فيه الواحدة ب 2ونص والقطيفة ب3ونص


***مفارش الزينة او الستان انتى وراحتك بقى عشان حسب فرشك مودرن او استيل

****

البنات اللى هتفصل ملايات دورى على النت على اشكال وكمان روحى المحلات واتفرجى

ودى افكار ممكن تنفع ان شاء الله
سهل انك تعمليها بنوعين قماش او بشيفون مع قماش







هحاول المشاركات الجاية احط لكم صور ملايات ان شاء الله


وبكرر اهو كلامى مش ملزم لاى واحدة انا بحط لك خطوط عريضة وكل واحدة تجيب حسب امكانيتها

وربنا يوفقكم