حاجات جبتها وقلت افيدكم بيها

السلام عليكم ورحمة الله

ازيكم يابنات

اكيد زهقتم من المواضيع اللى زى دى واتعملت كتير

انا قلت احاول افيدكم على قدى

فى حاجات اشتريتها وطلعت حلوة وحاجات تانية ماطلعتش حلوة خالص

فقلت اقولكم عشان تاخدوا بالكم
واللى عندها حاجة هى كمان تفيدنا بيها ياريت


بالنسبة للأكل

*احسن انواع السوسيس والسجق والكفتة والهوت دوج

هما نوعن تحفة

الحسن والحسين
وأطياب

اوحشهم

فودينا وامريكانا وثرى شيفز

*احلى مرقة فاين فوردز
وماحى مش حلوة


*مساحيق الغسيل
اريال حلو للأبيض بس بيجرب الالوان وغالى
برسيل تحفة للالوان والابيض بس بردوا غالى

بايوكلينا زفت

بونكس تحفة ورخيص

وشفت بنات فى فتكات بيمدحوا فى مسحوق اسمه ديلر وبيقولوا حلو بس مش موجود كتير

صراحة ما اعرفش عنها حاجة


* جبت المقص الفتلة




زفت ومالوش اى لزمة وخسارة الفلوس فيه
مابيشليش حاجة


*جبت الصنفرة بتاعت ازالة الشعر



وحشة دى قليلة عليها

هى بتشيل الشعر وبتنعم الجلد

بس الشعر بيطلع بسرعة

وحشة ليه بقى

اوعى تستعمليها على وشك ابدا

استخدمتها على رجلى وما اقلكوش بقى ناااااااااااااااااار
طبعا ما انتى بتحكى جلدك عشان تشيلي الشعر

فالجلد بيلتهب اوى
انا يومها ماعرفتش انام من وجع رجلى ورميتها وقررت ما استعملهاش تانى

*نيجي بقى للمكيب اب
جبت جارنيه روا اون لاخفاء الهالات السودا
ودفعت 35 جنيه بحالهم

وبصراحة ولا له اى لزمة


*الاجهزة الكهربائية
بوتجازى ايديال
وزى الزفت
عندى وعند بنت خالتى وحماتى
بايظ ووحش والعيون بتسخن وباب الفرن لما بيسخن مش بيتقفل والجناب بتاعته طلعت لبره
حاجة يعنى ما اقولكوش
ده غير ان الشواية مش بتلف حتى لما جبنا الصيانة وصلحتها بردوا بايظة

*السخان اوليمبك تحفة ماشا ءالله

*تلاجة توشيبا ال3 باب مش حلوة الخضار بيبوظ لان الحرارة مش بتوصل للدرج خالص
فمش بستخدمه
وعند سلفتى باظت وهى شارياها بعدى وبيحطوا لها مروحة عشان تشتغل
ههههههههه اه والله
تلاجة وايت ويل احلى من توشيبا عن قريبى وحلوة ماشاء الله

(فقى فتوكة بتقول التلاجة حلوة وعندها تابعوا اول رد)

* بديل الزيت تحفة جبت بديل الزيت من ايفا رائع وبيخلى الشعر حرير
ولا مزيت ولا يهيش بعد شوية

*شامبو السجاد فاست رائع
خصوصا انى قريت ان ماينفعش تغسلى سجادتك الا بشامبو السجاد
عشان الوانها ماتبهتش ولا خيوطها تبوظ

*احلى بامبرز جبته ريحته حلوة وبيعد 12 ساعة من غير ماينقع
هو ايفى بيبى

العلبة 64 واحدة ب 60 جنيه

جربت كمان
ماركات حلوة زى
كان بيبي
جاجلز
وبيبي جوى
اوحش بامبرز سليبي
جاب لبنتى تقرحات

*العرايس اوعى تنجدى مراتب اوعى
المراتب بتبوظ انا جبت اغلى قطن درجة اولى
وبردوا بتبتقى حتة عالية وحتة واطية
وغيرت وجبت مراتب صحية

* احلى مراتب صحية بالترتيب لانى سألت كتير بياعين وسألت قرايبي كما
هابيتات تحفة عند قرايبى بتعد سنين
ألدوار وماستر بيد تحفة
فور بد مش اوى طرية اوى زيادة عن اللزوم
يانسن الجديدة زفت

*بنت خالتى جابت لحاف فايبر من الشركة السعودية فى النت
ورمته فى الزبالة قامشته وحشة اوى وكمان مش مليان فايبر وحش اوى

احلى لحاف فايبر هو المجد عندى بتاع الاطفال اكتر من رائع ماشاء الله

*الحلل التيفال انا جبت التيفال التركى وهى جابت زهران
وعايزة ترمى بتاعها فى الزبالة
الاحسن التيفال التركى والسافلون
والافضل صحيا بقى الاستانلس

تابعونى يمكن افتكر حاجة تانى ان شاء الله

اللى عندها حاجة تقولها

ماتنسوش التقييم يابنات

ودعوة حلوة بسداد دين جوزى
وربنا يحمى بناتى من كل شر