السبت، 30 مارس 2013

عيوب قاتلة احذرى منها وانتى بتعملى مطبخك

أولا : مهما كانت مساحة مطبخك .. لازم تسيبى مكان مناسب ليكى قدام البوتاجاز والفرن تحديدا ... عشان خطورة الحاجات اللى هتحطيها فى الفرن وتخرجيها وتحافظى على سلامتك من الحرق - لا قدر الله - لو عملتى الحاجات دى وانتى مزنوقة 
ملحوظة : معظم بتوع المطابخ - للأسف - كل همهم انهم يغطوا كل المساحات عشان يعدوا فلوس

ثانيا : بالنسبة للحوض : من أكبر الغلطات اللى بتقع فيها كل واحدة بتعمل مطبخ .. الحوض
الأحواض الاستانلس نوعين : واحد فيهم بيكون اسمه ساقط رخام .. وده بيكون الفريم اللى حواليه بيكون عدل ومفيهوش أى ميل .. ده بيتفتحله حاجة زى افريز صغير فى الرخام بحيث ان الحوض بالكامل بيكون غاطس جوه الرخامه .. فالمياه اللى على الرخامة بتنزل بالكامل فى الحوض .. و النوع ده بيكون فى حلة واحدة وحلتين بس بدون صفاية
النوع التانى بيكون الفريم بتاعه بيكون فى بومبيه صغير بيكون على الرخامة .. هو مش كبير بيبقى حوالى 5 ملى بس بيمنع جزء كبير من المياه انها تنزل الحوض بنفس سهولة التانى .. وبمرور الوقت بتبدأ فطريات تتكون على الفريم ده حول الحوض ... النقطة دى مهمة جدااااااااااااااااااااااااااااا .. خلوا بالكوا .

ثالثا : الأولوية للاستعمال ثم الشكل 
بنقابل كتير ان واحدة جاية عاوزة تعمل مطبخ فى شقتها وبتكون طبعا شافت موديلات كتييييييير جدااا على النت وكتالوجات وكده وعاوزه واحد عجبها ... يا جمااااااااااااااعة الديزاينات اللى موجودة بتكون مساحتها واااااسعة اوى .. لازم المطبخ يشيل كل حاجتك او معظمها على الأقل .. عشان مش بعد ما تستعمليه بسنة ولا اتنين تحتاجى تعدلى فيه ... لازم فى الجزء السفلى يكون فى مش اقل من وحدتين للحلل والصوانى والحاجات الضخمة .. وبعد كده فكرى فى الشكل .. والجزء العلوى قبل ما تشوفى هتعملى ايه طويل وايه ارفف ديكور شوفى هتحطى الكاسات والكوبايات والأركوبال فين هع هع هع

رابعا : انتى ملكة مطبخك .. بمعنى ان ذوقك هو اللى لازم يكون هو السائد عشان محدش هيقف فيه غيرك .. حاولى متتأثريش بلون مطبخ بنت خالتك ولا ديكور مطبخ بنت طنط فوفو ولا توزيع اضاءة مطبخ بنت عمتو
انتى اكتر واحدة لو قارنتى هتتعبى عشان كل مطبخ وليه حالته الخاصة .. لازم تكون الألوان والاضاءة وكل حاجة فيه مريحاكى نفسيا عشان الأكل يطلع كويس ( دى دراسة علمية مش بفتى ) ... كل حاجة لازم تعجبك أو لو حاجة مش عاجباكى لازم تقتنعى باللى هيركب ... بيجيلى عملاء بعد 5 شهور جواز بيكونوا عاوزين يعدلوا فى المطبخ !!!

خامسا : اللى بينفذلك المطبخ لازم تكون رؤيته واضحة . هو أكثر خبرة منك و أكيد دخل مطابخ شبه مطبخك فبالتالى عنده فكرة اكتر على احسن توزيعه لمطبخك .. لو حستيه مش عارف هيعمل ايه انصحك متنفذيش عنده لأن أى تصميم مهما كان جميل مش هيطلعه كويس .. المطابخ أكتر حاجة لو مفيش ابتكار موجود عند اللى بينفذها بتتطلع سيئة

سادسا : الاكسسوارات فى المطابخ أغلبها لا ينفع بقدر ما يضر ... لو مطبخك مساحته واسعة اعملى فيه كل اللى انتى عاوزاه .. بس متحكميش ان لازم ترولى وماجيك كورنر وسلة دوارة وهايد باسكت وامريكان ترولى يركبوا فى مطبخك وميبقاش فيه مكان لحاجتك .... احذرى الاكسسوارات فانها مميتة هع هع هع
.
.
.
.
دى حاجات اللى بتعدى عليا ف شغلى كمعرض مطابخ .. قلت افيدكم بيها
لو حد عنده أى سؤال انا تحت امره ... ويارب أكون بفيدكم
.

ليست هناك تعليقات: