إمتى أبدأ أأكل طفلي؟_في مدرسة في الطب بتقول تبدأي بعد نهاية الشهر الرابع, وفي مدرسة بتقول بعد الشهر السادس, وبالمناسبة الأعشاب زيها زي الأكل بتتاخد بعد الشهر الرابع.
يعني لو مستعجلة وعاوزة تبدأي بدري يبقى بعد ما طفلك يتطعم تطعيم الأربع شهور ويفوق منه (لو سخن مثلا) تبدأي معاه مش قبل كدة أبدا يا فتوكة.
إزاي أأكل الطفل وابدأ بإيه؟_لازم تبدأي معاه بالتدريج وبكميات بسيطة, ولازم تبدأي بنوع خضار واحد تستمري عليه 5 أيام بدون ماتغيريه علشان تشوفي النوع دة هيسبب حساسية للطفل ولا لأ, بعدها تبدأي بنوع تاني تستمري عليه بردو كام يوم بعدها نوع تالت وهكذا.
_تغسلي إيدك كويس جدا وتغسلي الخضار كويس جدا والأدوات اللي هتحتاجيها, وتسلقي الخضار كويس وتضربيه في الخلاط مع مية السلق بتاعته, ويكون في درجة حرارة الجسم يعني يادوب دافي بسيط, وبمعلقة الأطفال أو بمعلقة صغيرة تبدأي تأكليه بعد ماتسمي الله طبعا.
_إبدأي بمعلقتين مثلا بالنهار, وزيهم آخر النهار واستمري يومين على الكمية دي. تالت يوم ممكن تزودي شوية لو حسيتي أن الطفل متقبل الأكل وعاوز تاني.
_وياريت يكون الطفل جعان علشان يرضى ياكل, ويكون مغير الحفاضة ومفيش حاجة مدايقاه, وتلاعبيه وانتي بتأكليه.
أبدأ بإيه؟_يفضل البدأ بالخضار وبعد فترة نعطي الطفل الفواكه.
_جميل إنك تبدأي بالكوسة لأنها خفيفة وطعمها حلو, بعدها الجزر(بس ممكن يعمل إمساك فلو عمل مش تديهوله لوحده لأ خليه مع الكوسة) بعدهم بطاطس مسلوقة, بطاطا, بعدين بسلة, فاصوليا خضرا وبعد فترة دخليله قرنبيط, بامية.
_الفواكه الآمنة اللي نبدأ بيها هي ( تفاح, كنتالوب, جوافة, كمثرى, برقوق, مشمش, خوخ, قرع عسلي, بلح, موز)
_وطبعا تكون عصاير طبيعية تعمليها في البيت مش معلبة, وبدون سكر ولا عسل قبل عمر سنة.
طيب إزاي هعرف إن نوع الأكل دة عمل حساسية؟_ممكن تلاقي الطفل شفايفه إحمرت أو ورمت, ولسانه إحمر.
_ممكن تظهر بقع حمرا في جسمه.
_ممكن يحصل قئ أو إسهال أو إمساك.
وطبعا مش أول ماتحصل حاجة غريبة نقول إن دي حساسية من نوع الأكل دة. لأ إحتياطي توقفي النوع دة وتروحي للدكتور هو اللي يحدد سبب العرض دة.
حاجات بنديها لأطفالنا في بداية الأكل مع إنها مضرة:في بعض الأطعمة مضرة للأطفال قبل سن معين, وممكن تكوني بتديها للطفل وانتي مش عارفة زي إيه؟؟
_ على رأسهم الزبادي
. عارفة إن كتير هيستغرب لكن فعلا هو مضر وليه مشاكله اللي مش بتظهر دلوقتي لكن بتظهر مع مرور الوقت.الزبادي مش قبل 9شهور. ويكون زبادي طبيعي اللي من عند اللبان أو تعمليه في البيت أفضل, مش المعلب وطبعا بنشيل الوش الدهني منه.
_كمان البرتقال في بعض الامهات بتديه للطفل بدري, لأ البرتقال مش قبل الشهر التامن أو التسع أبدا لأنه حمضي جدا وحتى لو خففتيه.
_السكر مضر جدا للأطفال قبل عمر سنة مفيش نقاش, والعسل كمان, والملح.
_ البيض مش قبل 8شهور الصفار, والبياض بعد سنة.
_ اللبن الحليب والأجبان بعد سنة.
_ البسكوتات والعصاير حتى لو بسكوت سادة وحشة جدا, لأنك بتلاقي عليه في مكوناته مكتوب (زيوت نباتية مهدرجة) ودي خطيرة جدا, دة غير المواد الحافظة, إذا كانت هي مضرة للكبار فما بالكم بالأطفال الرضع.
في نقطة مهمة جدا جدا كل الكلام اللي فات دة مبني عليها_ ممكن فتوكة شاطرة تقرا الكلام تقوم تقول (طيب ما فلانة بتأكل ولادها كذا وكذا من عمر شهرين ودلوقتي هما زي الفل) وواحدة تقول (دا أنا كنت بشوف فلانة بتلحس ولادها من الطبيخ ومن كل حاجة بتاكلها علشان يعرفوا الأكل من صغرهم ومش يرفضوه بعدين)
_أو واحدة مثلا تشوفك بتأكلي بنتك أو إبنك عنده 5 أو 6شهور أي نوع خضار مسلوق بدون ملح تقولك (حرام عليكي حطيله شعرة ملح, إنتي ممكن تاكلي الأكل ماسخ كدا؟) أو تفاحة مهروسة مثلا تقولك (إيه دة حطيله معاها سكر ولا عسل علشان يرضى ياكلها)
_ أو واحدة تقولك (أنا بدأت بالذبادي من عمر 4شهور وبسكوت مع شاي وموز وعسل
) و... و... و... 
طيب بالعقل كدا هرد عليكم:
أولا: ولنفرض جدلا إن الكلام دة صح ودي حاجات مش هتضر, طيب ماهو لو أنا أخرتها شوية بردو مش هيضر ولا إيه؟ثانيا: ماتقوليش ماهو أنا عاوزة أنوع في الأكل للطفل, هو لو عمره 6شهور بس في أنواع كتير هي ممكن ياكلها, ماهو أنا مش هضر ابني لمجرد إني أنوعله في أكله.ثالثا: ممكن تقولي إبني بيرفض الأكل بدون ملح ولاسكر علشان ماسخ, هقولك أثبت علميا إن تذوق الأطفال مش زينا خالص, احنا اللي بنعود الطفل على الملح أو السكر, إنتي بس حاولي وماتزهقيش هو علشان متعود على طعم لبنك بيستغرب أي حاجة تانية وبيرفضها في البداية, وساعات بيرفضوا دلع.رابعا ودي مهمة: مش معنى إن في حد كان بيأكل ولاده (لحاجات اللي بنقول عليها مضرة) وولاده كويسين مش معنى كدا إن الحاجات دي آمنة.1_ مين قالك إن إبنها ولا بنتها كانوا كويسين فعلا؟ أكيد مناعتهم ضعيفة,وبيتعبوا كل شوية.
2_ الأضرار دي مش شرط تبان فورا, لأ دي حاجات بتظهر مع الوقت.
3_ هديكم مثل هو صعب شوية سامحوني, لكن عاوزة أبينلكم خطورة الأمر وإنه مش هين زي ماحنا فاهمين:
إنتوا عارفين إنه من سنين عندنا تلوث في الميا وفي الجو وفي الأكل حتى المزروعات كلها مواد مسرطنة بسبب السماد الفاسد وغيره, والهوا الفاسد بسبب دخان المصانع وغيره, هو معنى إن أنا شخصيا (عنان) مش عندي سرطان ولا فشل كلوي ولا مرض وحش؛ هل دة معناه إن الحياة بمبي والدنيا بخير ومفيش تلوث في الهوا والميا والأكل؟؟؟
طبعا لأ, لأن فيه مئات الآلاف غيري عندهم فشل كلوي وغيره من الأمراض الوحشة دي حتى إن الأطفال الصغيرين ماللين مستشفى السرطان (ربنا يعافينا) بسبب التلوث. قولتلكم سامحوني على المثل.
تاني بكرر إن مش معنى إن فلانة ولا علانة أكلت ولادها الحاجات دي وكانوا كويسين إني أعمل كدا.
بالله عليكم يا أمهات ولادنا دول أمانة وأكيد نفسنا يكونوا أحسن ناس صحيا ونفسيا واجتماعيا وكل حاجة, فلازم ناخد بالنا, مش هنخسر حاجة لو نظمنا لهم أكلهم وأخرنا عنهم حاجات قد تكون مضرة ليهم, وحتى لو نافعة تأخيرها مش هيضر.
يعني بالله عليكم إحذروا السكر والعسل للأطفال قبل سنة واللبن كمان والحاجات التانية اللي في بداية الموضوع.
والبسكوت والكيكات (بيكون فيها زيوت نباتية مهدرجة ودي مادة مضرة جدا) والزبادي المعلب زي جهينة وغيره وكل حاجة فيها مواد حافظة, المواد الحافظة دي مواد مضرة ووحشة والله وبيحذروا منها الكبار؛ تيجي إنتي تديها لبنتك اللي بتر
طيب لو طفل عمره 8شهور أو أكتر ياكل إيه تاني؟_ دلوقتي مسموح بكل أنواع الخضراوات وكمان الطماطم.
_ممكن بردو الشوفان والمكرونة والرز.
_ممكن تضيفي الكسبرة والشبت والبقدونس للأكل, ممكن كمون وقرفة بسيط.
_البقول بقى نوعي للطفل منها زي (اللوبيا, الفاصوليا, العدس الأسمر والأصفر (تعمليهم مع الرز نوعين الكشري)).
_كبدة الفراخ, والفراخ, والسمك (بس بحذر) وياريت لو تأخريه شوية هو واللحمة.
_بعض المراجع في التغذية بيقولوا إن ممكن إضافة زيت الزتون (الأصلي), البصل والتوم. فانتي إستخدميهم بس بحرص.
بس مش تعمليله الأكل محمر ومشمر يا فتوكة لأ طبعا.
يبقى ممكن بقى تعملي لبنوتك إيه؟_تجيبي نقطة زيت في الطاسة وتقطعي فتفوتين بصل وتقطعي طماطماية بدون قشر ولا بذور وتحطي الخضار وتسوي بدون ملح وتبقي أكلتيها طبيخ ودة ينطبق على كل أنواع الخضار .
_بردو بنفس الطريقة وبدل الخضار مكرونة.
_ممكن تسلقي حتة فرخة جامد مع الخضار وتهرسي كويس جدا وبالهنا والشفا.
_الشوفان مفيد جدا ممكن تسلقي حتة فرخة بشوية بصل صغننين وشوية كمون وبس, وفي شوربتهم تحطي الشوفان يستوي.
_إسلقي الرز مع العدس مع بصلاية صغنونة جدا وكمون بسيط
كل دة بدون ملح بكرر.
وأبدعي بقى في حدود المسموح. بس ماتعكيش يا فتوكة.
_الزبادي بعد الشهر التاسع, وزبادي طبيعي مش معلب.
_ كذلك متاح كل أنواع الفواكه ماعدا (الكريز) قريت في مرجع إنه يعطى للطفل بحذر, والعنب والرمان بلاش علشان بعد الشر مش يقف في زورهم, بس ممكن عصير طبعا, بدون سكر ولا عسل بكرر.
كدا يا فتوكة إبنك أو بنتك متاح ليه عشرات الأنواع من الخضار والفاكهة والحبوب وغيره.
يبقى مفيش داعي للبسكوتات والعصاير المعلبة والحاجات المضرة دي
من الحاجات المعتادة الإمساك عند الطفل حديث الولادة.(الإمساك)
لكن أولا في حاجة لازم نعرفها :
في أعراض غير مقلقة ماقولش عليها إمساك_إن الطفل اللي بيرضع صناعي بالنسباله الإمساك العادي يعتبر طبيعي, كذلك الطفل اللي بدأتي تأكليه من فترة قريبة طبيعي إنه يصاب بإمساك كرد فعل من المعدة لتغيير نوع التغذية ودة لفترة وبعدين المعدة بتتعود.
_في كتير من حديثي الولادة بيفضلوا يحزقوا كذا مرة على مدار اليوم .. دة مش معناه إن عندهم إمساك أو صعوبة في الإخراج, لأ دة شئ طبيعي بالنسبة لحديثي الولادة.
_الطفل لو عمل براز 3مرات في الأسبوع دة مش عنده إمساك. (أنا بنتي فضلت حوالي شهر ونص بتتبرز كل 4أو 5أيام والدكتور قال عادي طالما البراز سايل مش ناشف, وفضلت بردو حوالي شهر تعمل إسهال 3مرات في اليوم. بردو الدكتور قال طبيعي لأن الطفل لحد 6شهور معدته لسة ماستقرتش على حال. وفعلا راح الموضوع دة ورجعت عادي بدون أدوية).
يبقى كل دة طبيعي ومايقلقش, ومايخليناش نجري ندي الطفل لبوس جلسرين, الجلسرين وحش إلا للضرورة وبوصف الطبيب وبجرعة بسيطة جدا ومابيتكررش.
طيب إمتى أقول إن الطفل عنده إمساك وإيه هي أعراضه1_ لو الطفل كان آخر مرة تبرز فيها من 6أيام والبراز ناشف متحجر على شكل كرات, أو على هيئة كتل.
2_ لو الطفل بيتألم عند عملية التبرز.
3_ لو كان البراز معاه دم. (ودة بيكون بسبب تشقق في المستقيم أثناء التبرز).
4_ لو أصبحت البطن قاسية الملمس (يعني ناشفة بسبب إحتباس الغازات).
والنقطتين الأخيرتين لازم إستشارة الطبيب.
بعض الأمور اللي تساعد في التخفيف عن طفلك:_ طبعا الرضاعة الطبيعية.
_ لو الطفل4شهور أو أكتر لازم يكون أكل الطفل محتوي على الألياف عن طريق تناول الفواكه والخضراوات المناسبة لعمره.
_ لو الطفل أكبر من 8شهور إديله عصير برتقال. وزوديله من السوائل عموما.
_ الدكاترة بينصحوا بعصير الخوخ والمشمش للإمساك, ودة آمن للطفل من 4شهور.
_ حاولي تحركي رجليه بأسلوب الدراجة يعني كأنه راكب عجلة وبيبدل، دة بيساعد في تحريك الفضلات في أمعائه.
_ توقفي عن إعطائه الأطعمة التي ق تسبب الإمساك، زي (الأرز، والموز، والجزر, أو الحبوب).
_ إعملي مساج لبطنه (بزيت جونسون للأطفال أو بزيت الزتون) يعني تحطي كام نقطة على البطن وتدلكي براحة بحركة دائرية. دة بيخلي البطن تتحرك والأمعاء تتنشط.
_ اليانسون المركز والحلبة مفيدين للإمساك (مركز بمعنى إنه بدل معلقة صغيرة على كوب ماء يبقى معلقة صغيرة على نص كوب).
أكيد إن شاء الله لو عملتي الحاجات دي الطفل هيخف لوحده, لكن بعد الشر لو الموضوع إستمر فترة طويلة يبقى طبعا تروحي تكشفي عليه.
تحذيـــــــر:من الوصفات اللي بتتوصف لعلاج الإمساك: غمس قطنة في زيت الزتون أو أي زيت وإدخالها (معذرة) في بداية فتحة الشرج, أو دهن فتحة الشرج بالزيت.
الوصفة بتجيب نتيجة فعلا لكن تكرارها مضر جدا جدا, بيسبب زي إرتخاء للعضلات في المكان دة, وعدم تحكم في عملية الإخراج بعد كدة. فياريت ناخد بالنا ونلجأ للعلاج الصحيح.
الإسهال عند الرضع(تعريفه, أسبابه, علاجه).
الإسهال من الاعراض شديدة الضرر للطفل وليه مخاطر كتير عافانا الله وإياكم.
بداية: إمتى أقول إن الطفل عنده إسهال(تعريفه)؟_الإسهال
كما تعرفه منظمة الصحة العالمية هو زيادة فى الحجم أوالسيولة أوعدد مرات
إخراج البراز عن الصورة المعتادة. ويحتوى البراز على مخاط او دم.يعني الطفل يعمل براز سايل جدا ولونه متغير ومصاحب ليه مخاط أو دم وعدد مرات متكرر.
_(يبقى لو الطفل الرضيع أقل من 6شهور وزادت مرات التبرز بتاعه حتى لو 5مرات في اليوم لكن البراز عادي لونه أصفر ومش زي المية. الدكاترة بيقولوا إن دة طبيعي ومايقلقش)
بعض أسباب الإسهال:1_ سوء التغذية وقلة المناعة.
2_ الغذاء او الماء الملوث, وتقلب الفصول.
3_ عدم نظافة الأدوات المستخدمة للطفل مثل زجاجة الرضاعة(الببرونة), اللهاية(التتينة), الأواني والملاعق المستخدمة في إطعامه.
4_ تقديم أطعمة غير مناسبة لعمر الطفل وخصوصا الحليب ومنتجاته مثل الزبادي والجبن.
5_ سوء إستخدام الأدوية مثل الإستخدام المفرط للمضادات الحيوية, واستخدام الملينات لمدة طويلة, والأستخدام المفرط للأدوية المحتوية على فيتامين (أ) فإنه بالرغم من أهمية فيتامين (أ) إلا ان الإفراط فى استخدامه له أضراره.
لعلاج الإسهال:طبعا يجب الإستمرار في الرضاعة الطبيعية لأن البروتينات الموجودة فى حليب الأم لا تتسبب فى تهيج غشاء الأمعاء, لكن لو كان الطفل يرضع صناعيا فيجب تغيير نوع الحليب بما يتناسب مع حالته.
1_ أهم شئ فى علاج الإسهال عند الأطفال هو تعويض السوائل والمعادن المفقودة ويتم هذا من خلال مايسمى بمحلول معالجة الجفاف.
2_ يجب الأهتمام باعطاء الطفل السوائل لتعويض مافقده خصوصا لو كان الإسهال مصحوب بقئ.
3_ عدم إعطاؤه السوائل المسكرة كعصائر الفاكهة لأنها تزيد من الإسهال.
4_ إذا كان عمر الطفل يزيد على 5 إلى 6 شهور يمكن إعطاء الطفل أطعمة مضادة للإسهال مثل الموز المهروس أو التفاح النيئ المبشور.
5_ طبعا تجنب الأكلات الملينة مثل (عصير الخوخ والمشمش والبرتقال).
5_ عرض الطفل على الطبيب لو الإسهال إستمر وصاحبه قئ أو ارتفاع في درجة الحرارة.
وأسأل الله أن يعافي أطفالنا جميعا من كل سوء
ليست هناك تعليقات:
إرسال تعليق