فراخ مشويه بتتبيله تجنن وارز معمر

منيو النهارده (فراخ مشويه / ارز معمر /سلطه حمص )

اولا الفراخ لازم تتبليها قبلها بيوم بتدى تست عالى اوى

بس انا مصورتش المرحله بتاعه التتبيل لانى مكنتش عارفه انى هنزلها بس هنشوف صور ليها وهى فى الفرن على الشوايه وصور لما استوت

هنتبلها بايه بقى

(علبه زبادى - بصله وسط - طماطمايه وسط - 5 فصوص ثوم- ملح - فلفل - جنزبيل بودر - كزبره ناشفه - قرفه - كركم - مسترده - ليمونه كبيره - معلقتين كبار خل - معلقتين زيت - وفى مطحنه التوابل 2 قرنفل و2 حبهان و2 لورى ونصف معلقه سكر ) وددددددشششش فى الخلاط يطحنوا نحطهم على الخلطه دى

ونقسم الفراخ بالطول ونعمل فتحات بالسكينه علشان تستوى كويس وتشرب من التتبليه

ونحط الخلطه دى على الفراخ وعلى الثلاجه عدل تطلعيها تانى يوم وعلى الفرن

انا عندى الشوايه دى زى بتاعه الراجل اللى بيشوى الفراخ برا وبحط تحتها صينيه فيها ميا علشان البخار يسوى الفراخ ولو مش عندك ممكن تحطيها فى صينيه عاديه وتحطي تحتها بطاطس وجزر وطماطم

ودى صورتها وهى فى الفرن فى نصف مرحله الشواء طبعا الفرن حاااامى اوى



بتقعد فى الفرن حوالى ساعتين حسب حجمها طبعا وبعد ما استوت دى شكلها

نخش على الرز المعمر الجامد

انا عملت كيلو ارز يعنى 5 كوبيات رز

(كيلو ارز - كيلو لبن - 2 كوب ماء - 2 مرقه لحم - ا علبه زبادى - زبده - ملح - ومعلقتين صغيرين سكر - فلفل اسمر بسيط )



فى كسروله هنحط 2 كوب ماء مع مكعبين المرقه على النار لحد ما يدوبوا




وهنا دابوااااا

ونحط عليهم اللبن



نسيبهم يغلوا كويس اوووووووى



على ما يغلى اللبن والشوربه ندعك الرز بالزبده والزبادى والملح والسكر والفلفل كويس اوووى





نراقب طبعا اللى على النار كويس واول ما يغلى نحط اللبن على الرز ونقلب تقليبه حلوه



وعلى الفرن عدل

وهنا الرز شرب اللبن



وحمرت وشه هنا وبقى تمام




وهنا لما طلع من الفرن



وعملت سلطه حمص كانت جامده اوى مع الفراخ والرز

مقاديرها

( 1/8 حمص -فصين ثوم - طحينه - معلقه زبادى - ربع كوب زيت - ليمونه - 3 ملاعق خل - ملح وكمون - كوب الا ربع ماء )

طبعا بيتنقع الحمص الشامى قبل النقع حوالى ساعتين وبيتسلق كويس اوى وكله على الخلاط

متنسيش تبردى الحمص علشان مش يطبخ مع الثوم

وهنا فى دورق الخلاط



وهنا لما جهز