كيكة البرتقال سهلة ومضمونة ان شاء الله من مطبخى

كيكة البرتقال من مطبخى مضمونة وسهلة ان شاء الله

بسم الله

المقادير

3 بيضات حمرا كبار

3 كوب دقيق

كوب ونص سكر
كوب زيت أو زبده(بس الزيت بيخليها خفيفه اوى)
كوب عصير برتقال وقشور برتقال

(كوب لبن لو عايزاها كيكة عادية مش بالبرتقال)

ورقه بيكنج بودر

ورقتين فانيليا

الطريقه

فى الخلاط تحطى ال3 بيضات مع الفانيليا وتضربى كويس اوى لحد لما المقدار يتضاعف
وبعدين تحطى السكر على 3 دفعات وتضربى كويس اوى بين كل مره والتانيه
بعد كده تحطى العصيروقشور ابلرتقال وتضربى كويس

وبعدين تضيفى الزيت وعلى فكره انا بستخدم زيت التموين وبصراحه مفيش فرق فى الطعم بينه وبين كريستال

وتضربيهم كويس اوى يعنى حوالى 10 دقايق كده وبعدين تصبى الخليط فى طبق عميق
وتكونى نخلتى الدقيق مع البيكنج بودر

هنا بقى تروحى تشغلى الفرن على 180 درجه
وتبدأى تحطى الدقيق شويه بشويه لحد لما تخلصى الكميه(أنا بحب اشتغل بايديا علشان لو فيه اى تجمعات دقيق افككها)
احط الدقيق بايدى الشمال واخلط باليمين بالراحه على شكل دايره وبعدين نص دايره وفى نفس الاتجاه 

بمعلقة خشب عشان الهواء مايخرجش

تجيبى بقى الصينيه المدهونه زيت ومبطنه دقيق وتصبى الخليط والكيكه دى بتاخد فى الفرن من 45 ل60 دقيقه