عملت الهامبورجر وطلع احسن من الجاهز

الحمد لله عملت الهامبورجر وطلع احسن من الجاهز وعجب جوزى وكل اللى داقه الحمد لله
حبيت اقولكم الطريقه علشان كلنا نستفيد
اهم حاجه انك متأكده من نظافته وجوده الحاجه اللى فيه
علشان صحه اولادنا وصحه الناس اللى نحبهم

المقادير
*****
نصف كيلو لحم مفروم
3بصله متوسطه
3طماطم
3فلفل ممكن حار او رومى حسب رغبتك
2كيس فيجيتار
1كيس بكنج بودر
ملح فلفل بهارات
شويه زيت صغيرين خالص يعنى قولى معلقتين كبار من بتوع الاكل

الخطوات
******
هنفرم اللحم ياقمرات وبعدين قطعى عليهم الطماطم والفلفل والبصل قطع صغيرة
او ممكن تفرميهم فى الكبه حسب رغبتك
وضيفى كل المقادير على بعضها
وحطيهم شويه فى التلاجه على الرف علشان تتحكمى فى العجينه نصف ساعه ممكن
طلعيها باه تكونى مجهزة الصوانى ودهناها زيت بالفرشه متكتريش ياقمر
اقطعى حته صغيرة وكوريها واعمليها قرص وحطيها فى الصوانى
بعد ماتخلصى سخنى الفرن 10دقائق
وحطيها على نار متوسطه 180درجه لمده 7 دقائق بسسسسسسسس
لحد ماتستوى مش هتاخد حاجه
وشغلى الشوايه يتحمر الوش وخلاص
جهزى العيش الكيزر المدرور وحطى قطعه البورجر وعليها طماطم فلفل بصل جبن رومى خس كاتشب
زى ماتحبى
الف هنا وشفا

فى فتوكه ممكن تسال منحطش ميه تسوى اللحم
اقول لها لو اللحم صغيرة هتستوى من غير ميه فى 7دقائق والله عن تجربه
ولو كبيرة هتاخد سوا شويه ممكن تزودى ربع كوب ماء فى الصنيه

الموضوع من مجهودى والله عملته علشان الكل يستفيد ومعلش مبعرفش اصور بالموبايل اوى وكمان معلش طولت عليكم