الكوسة بالبشاميل طبعا كلنا بنعملها
بس النهاردة هعرض عليكوا طريقتي فيها
من غير لحمة مفرومة بس بتكة جديدة بتديها طعم جمييييل ويارب تعجبكوا ان شاء الله
المقادير
انا بعملها تكفي فردين
نص كيلو كوسة
بصلة
2 قطعة فراخ فيليه(دي التكة اللي بتديها طعم جميييل)
معلقة سمنة
ملح* فلفل اسود
مقادير البشاميل
4 معلقة زبدة
4 معلقة دقيق
2 كبشة شوربة
2 كبشة لبن
كريمة لباني (او) رشة فانيليا
ملح* فلفل ابيض *ذرة قرفة
الطريقة
للكوسة
اول حاجة نقطع البصلة صغنن خالص ونشوحها بسيط وننزل عليها بقطعتين الفراخ الفيليه المقطعين زي تقطيع البصل مش بحب شكله يبان مجرد تحسي بطعم حاجة مختلفة خصوصا لو كانوا متبلين من قبل كده
وبعدها ننزل بالكوسة المقطعة حلقات
وندي رشة فلفل اسود او ابيض وملح علشان الكوسة بس مش كتيير علشان البشاميل فيه ملح برضه
ونقلب
ونضيف ربع كوباية مية ونغطيها ونسيبها تستوي 90%
في الوقت اللي هتستوي فيه نجهز البشاميل
نضع الزبدة عالنار ونضيف عليها الدقيق ونقلب على حسب اللون اللي تحبي الدقيق يوصله بس انا مش بخليه يتحمر
وننزل باللبن والشوربة ونقلب بالمضرب السلك بسرعةعلشان مش يكلكع
ونضيف الملح والفلفل و شوية كريمة لباني ودي النكهة الاولى بجد لو جربتيها في البشاميل هتدمنيها وبتدي طعم خياااااااااااااال بتدي لاي اكل نكهة مميزة حتى لو مش هتعملي بيها اكلات كتير ممكن تجيبيها يوم البشاميل كفاية
طيب لو مش متاح عندك كريمة
ممكن تضيفي نكهة تانية للبشاميل
وهي رشة الفانيليا
برضه بتخلي طعم البشاميل مميز جدا وتاكليها تحسي ان الاكل في حاجة لذيذة وطبعا الفانيليا متاحة عندنا في كل البيوت
بس مش هينفع تحطي الكريمة والفانيليا هيغيروا طعم بعض
حاجة واحدة بس
وهنا الكوسة استوت وحطيتها في البرام علشان تدخل الفرن
وضيفت عليها البشاميل
ما شاء الله شوفي شكل البشاميل ناعم وكريمي ازاي
ودخلتها الفرن مجرد البشاميل يتحمر او ياخد وش بس
والف هنا
ليست هناك تعليقات:
إرسال تعليق